ЗАЛУУЧУУДЫН ХӨДӨЛМӨР ЭРХЛЭЛТ, ГАРААНЫ БИЗНЕСИЙГ ДЭМЖИХ ХӨТӨЛБӨР
Залуучууд болон мэргэжлийн боловсрол, сургалтын байгууллагын төгсөгчдийг аж ахуй, бизнес эрхлэх ур чадвар, шинэлэг санаанд тулгуурлан гарааны болон санхүүгийн дэмжлэг олгох, бизнесээ тогтвортой эрхлэхийг дэмжих зорилготой.
Хэрэгжүүлэх арга хэмжээ 1:
Гарааны бизнесийг дэмжих арга хэмжээг туршилтаар зохион байгуулах
Залуучуудад аж ахуй эрхлэлт, загвар бүтээх сэтгэлгээний сургалтыг гарааны бизнес санааг баяжуулах, өрсөлдүүлэх зөвлөгөөг бүлгүүдийн хэрэгцээ, хүсэлтэд үндэслэн мэргэжлийн боловсрол, сургалтын байгууллагын дэргэдэх бизнес инкубатор төв, эсвэл мэргэшсэн, эрх бүхий байгууллагын туслалцаатайгаар зохион байгуулж, сонгон шалгаруулалт хийн, холбогдох зардлыг санхүүжүүлнэ. Шалгарсан нэг төсөлд 10,0 сая төгрөгийн гарааны дэмжлэгийг 36 сарын хугацаатайгаар олгоно. Санхүүгийн дэмжлэгийг гарааны бизнес эрхлэх хүний цалин хөлсөнд болон шаардагдах тоног төхөөрөмж, багаж хэрэгсэл, эргэлтийн хөрөнгө гэх мэт гэрээнд заасан зориулалтаар зарцуулна.
Хамрах хүрээ:
- Тус арга хэмжээнд гарааны бизнес эхлүүлэх, өрхийн үйлдвэрлэл эрхэлдэг, үйл ажиллагаагаа өргөжүүлэх хүсэлтэй 15-34 насны залуучууд өөрийн биеэр ирнэ.
Хэрэгжүүлэх арга хэмжээ 2:
Мэргэжлийн боловсрол, сургалтын байгууллагын төгсөгч болон төгсөгчдийн бүлэгт эргэн төлөгдөх санхүүгийн дэмжлэг олгох Мэргэжлийн боловсрол, сургалтын байгууллагын төгсөгчийг хувиараа болон бүлгээр хөдөлмөр эрхэлж, ажлын байр бий болгох зорилгоор тоног төхөөрөмж, багаж хэрэгсэл худалдан авахад нь зориулж нэг төгсөгчид 3,0 сая төгрөг, бүлэгт 10,0 хүртэл сая төгрөгийн санхүүгийн дэмжлэгийг олгоно. Төгсөгчид бүлэг болсон тохиолдолд 5-аас ихгүй гишүүнтэй байна. Төгсөгч болон бүлэг нь гэрээ байгуулснаас хойш 36 сарын дотор санхүүгийн дэмжлэгийг 100% эргүүлэн төлнө.
Хамрах хүрээ:
МСҮТ-ийг төгсөгчид
Хэрэгжүүлэх арга хэмжээ 3:
Мэргэжлийн боловсрол, сургалтын байгууллагын төгсөгч болон төгсөгчдийн бүлэгт борлуулалтын болон ажлын байрны түрээсийн хөнгөлөлт үзүүлэх арга хэмжээг зохион байгуулах.
Хөтөлбөрийн хүрээнд эргэн төлөгдөх санхүүгийн болон гарааны дэмжлэг авсан залуучууд. залуучуудын бүлгийг бараа, бүтээгдэхүүнийг борлуулахад дэмжлэг үзүүлэх, ажлын байрны түрээсийн төлбөрийн хөнгөлөлт үзүүлэх арга хэмжээг хэрэгжүүлнэ. Үйлдвэрлэл, үйлчилгээний зориулалтаар 6 болон түүнээс дээш сарын хугацаагаар байнгын ажлын байр түрээслэн үйл ажиллагаа явуулж байгаа бол түрээсийн гэрээ, холбогдох баримт бичиг, нөхцөл байдлыг газар дээр нь үнэлсэн үнэлгээнд үндэслэн ажлын байрны түрээсийн төлбөрийн хөнгөлөлтийг төлбөр төлсөн баримтыг үндэслэн нөхөн олгоно. Ажлын байрны түрээсийн төлбөрийн хөнгөлөлтөд хамрагдсан бол 24 сарын хугацаанд энэхүү хөнгөлөлтөд дахин хамруулахгүй.
Хамрах хүрээ:
- МСҮТ төгсөгчид болон, төгсөгчдийн бүлэг
