ХӨГЖЛИЙН БЭРХШЭЭЛТЭЙ ИРГЭНИЙ АЖЛЫН БАЙРЫГ ДЭМЖИХ ХӨТӨЛБӨР
Хөгжлийн бэрхшээлтэй иргэнийг хөдөлмөрт бэлтгэх, ажил олгогчийн дэмжлэгтэйгээр ажилд зуучлах, тэдний аж ахуй эрхлэлт болон хөдөлмөр эрхлэх ур чадвар олгох сургалтанд хамруулах, урамшуулал, санхүүгийн дэмжлэг, хөдөлмөр эрхлэлтийн тусгай үйлчилгээ, арга хэмжээнд хамруулж дэмжлэг үзүүлэх замаар хөгжлийн бэрхшээлтэй иргэнд зориулсан байнгын ажлын байрыг нэмэгдүүлэх, тэдний хөдөлмөр эрхлэлтийг дэмжихэд хөтөлбөрийн зорилго оршино.
Хэрэгжүүлэх арга хэмжээ 1:
Аж ахуй эрхлэлтийн болон Хөдөлмөрт бэлтгэх арга хэмжээг зохион байгуулах.
Аж ахуй эрхлэлтийн сургалтад эргэн төлөгдөх санхүүгийн дэмжлэг олгох арга хэмжээнд хамрагдахаар төсөл өгсөн болон бичил бизнес эрхэлдэг, цаашид эрхлэх хүсэл сонирхолтой хөгжлийн бэрхшээлтэй иргэн, байнгын асаргаанд байдаг хөгжлийн бэрхшээлтэй хүүхдийн эцэг, эх, асран хамгаалагчийг хүсэлтийн дагуу хамруулна. Хөдөлмөр эрхлэлтийн богино хугацааны сургалтад хөгжлийн бэрхшээлтэй иргэдийг хамруулж “Чадамжийн гэрчилгээ” олгоно. Хөдөлмөрт бэлтгэх арга хэмжээнд хөгжлийн бэрхшээлтэй иргэн жилд нэг удаа хамрагдана.
Хамрах хүрээ:
- Эмнэлэг хөдөлмөр магадлах комиссын хөдөлмөрийн чадвар алдалтын хувь хугацааг тогтоосон хүчин төгөлдөр шийдвэртэй, хөгжлийн бэрхшээлтэй иргэн
- Байнгын асаргаанд байдаг хөгжлийн бэрхшээлтэй хүүхдээ асарч буй эцэг эх
Хэрэгжүүлэх арга хэмжээ 2:
Ажилд зуучлах үйлчилгээг зохион байгуулах:
Хөгжлийн бэрхшээлтэй иргэний онцлогт нийцүүлэн, ажил, мэргэжлийн чиг баримжаа олгох, мэргэжлийн зөвлөгөө өгөх. Хөгжлийн бэрхшээлтэй иргэнийг ажлын ярилцлагад ороход туслах, ажлын байртай танилцахад нь хөтөч ажиллуулах бөгөөд хөтөч, дохионы хэлмэрч нь сургалтад хамрагдсан байна. Хөтөч, дохионы хэлмэрч, чиглүүлэгчийг цагийн ажлын хэлбэрээр ажиллах хугацаа нь ажлын 5 өдрөөс хэтрэхгүй байна.
Хамрах хүрээ:
- Эмнэлэг хөдөлмөр магадлах комиссын хөдөлмөрийн чадвар алдалтын хувь хугацааг тогтоосон хүчин төгөлдөр шийдвэртэй, хөгжлийн бэрхшээлтэй иргэн.
- Байнгын асаргаанд байдаг хөгжлийн бэрхшээлтэй хүүхдээ асарч буй эцэг эх
Хэрэгжүүлэх арга хэмжээ 3:
Эргэн төлөгдөх санхүүгийн дэмжлэг олгох арга хэмжээг зохион байгуулах.
Хөгжлийн бэрхшээлтэй иргэний ажлын байрыг дэмжих төслийн санхүүгийн дэмжлэгийн хэмжээ 5.0 хүртэл сая төгрөг байх ба дэмжлэгийг 4 хүртэл жилийн хугацаанд 100 хувь эргэн төлнө. Иргэний саналыг үндэслэн эргэн төлөлтийн хуваарийг гэрээнд хавсарган баталгаажуулна.
Хамрах хүрээ:
- Эмнэлэг хөдөлмөр магадлах комиссын хөдөлмөрийн чадвар алдалтын хувь хугацааг тогтоосон хүчин төгөлдөр шийдвэртэй, хөгжлийн бэрхшээлтэй хүн
- Байнгын асаргаанд байдаг хөгжлийн бэрхшээлтэй хүүхдээ асарч буй эцэг эх
Хэрэгжүүлэх арга хэмжээ 4:
Борлуулалтын болон ажлын байрны түрээсийн төлбөрийн дэмжлэг үзүүлэх арга хэмжээг зохион байгуулах
Ажлын байрны түрээсийн төлбөрийн хөнгөлөлтөд үйлдвэрлэл, үйлчилгээний зориулалтаар ажлын байр түрээслэн 12 сараас дээш хугацаагаар тасралтгүй үйл ажиллагаа эрхэлсэн хувиараа хөдөлмөр эрхлэгч хөгжлийн бэрхшээлтэй иргэнийг, мөн нийт гишүүдийн гуравны хоёроос доошгүй нь хөгжлийн бэрхшээлтэй иргэн байдаг нөхөрлөл, хоршоо, бизнес инкубатор төвийн бойжигчийг хамруулна. Ажлын байрны түрээсийн төлбөрийн хөнгөлөлтөд хамрагдсан иргэд 24 сарын хугацаанд энэхүү хөнгөлөлтөд дахин хамрагдахгүй.
Хамрах хүрээ:
- Хөгжлийн бэрхшээлтэй иргэнийг ажлын байраар хангаж буй ажил олгогч.
Хэрэгжүүлэх арга хэмжээ 5:
Ажил олгогчийг дэмжиж, урамшуулал олгох арга хэмжээг зохион байгуулах:
1. 25 болон түүнээс дээш тооны ажилтантай ажил олгогч Хөдөлмөрийн тухай хуулийн 111 дүгээр зүйлийн 1 дэх заалтаар тогтоосон хувиас давсан хэмжээнд хөгжлийн бэрхшээлтэй иргэнийг ажилд авч, 12 сараас доошгүй хугацаагаар ажлын байраар хангасан бол
2. Хөдөлмөрийн тухай хуулийн 111 дүгээр зүйлийн 1 дэх заалтад цөөн буюу 25 хүртэл ажилтантай ажил олгогч хөгжлийн бэрхшээлтэй иргэнийг ажилд авч, 12 сараас доошгүй хугацаагаар ажлын байраар хангасан бол байнгын ажлын байраар хангасан хүний тоогоор тус тус хөдөлмөрийн хөлсний доод хэмжээг 12 дахин нэмэгдүүлсэнтэй тэнцэх хэмжээний урамшууллыг нэг удаа олгоно.
Хамрах хүрээ:
- Хөгжлийн бэрхшээлтэй иргэнийг ажлын байраар хангаж буй ажил олгогч.
