ХӨДӨЛМӨР ЭРХЛЭЛТИЙН НИЙТЛЭГ ҮЙЛЧИЛГЭЭ
1. Ажил мэргэжлийн чиг баримжаа олгох, зөвлөгөө өгөх, мэдээллээр хангах
2. Ажилд зуучлах
3. Нэгдсэн бүртгэл, мэдээллийн үйлчилгээнд хамруулах
4. Ажилгүйдлийн тэтгэмжийн тодорхойлолт гаргаж өгөх
5. Бусад үйлчилгээ
Хэрэгжүүлэх арга хэмжээ 1:
Ажил мэргэжлийн чиг баримжаа олгох, зөвлөгөө өгөх, мэдээллээр хангах үйлчилгээ.
Ажил, мэргэжлийн чиг баримжаа олгох гэдэг нь: аливаа нэг хувь хүний амьдралын аль ч насанд ахиж дэвшихэд нь туслах зорилгоор хийгдэж буй боловсрол, сургалт, ажил, мэргэжлийн сонголт хийх мөн шийдвэр гаргахад дэмжлэг үзүүлэх үйлчилгээ, үйл ажиллагаа юм. Ажил, мэргэжлийн чиг баримжаа олгох, зөвлөгөө өгөх, мэргэжлийн зөвлөгөө өгөх, мэдээллээр хангах үйлчилгээг ганцаарчилсан болон хэсэг, бүлгээр зохион байгуулдаг. Ажил мэргэжлийн чиг баримжаа олгох, зөвлөгөө өгөх, мэдээллээр хангах үйлчилгээнд тодорхой ажил, мэргэжил, ажлын байрны талаарх мэдээ, мэдээллийг иргэдэд хүргэх, ажил,
мэргэжлээ сонгох болон хөдөлмөр эрхлэлтийн нийтлэг үйлчилгээ, арга хэмжээнд хамрагдах нөхцөлийн талаар зөвлөгөө өгөх, хөдөлмөрийн зах зээлийн мэдээллээр хангах үйлчилгээ хамаарна.
Хамрах хүрээ:
- Ажил хайгч,
- Ажил олоход хүндрэлтэй иргэн,
- Ажилгүйдэлд өртөж болзошгүй иргэн,
- Ерөнхий боловсролын сургуулийн сурагч,
- Их, дээд сургууль, коллеж, МСҮТ төгсөгч,
- Ажилтан албан хаагч,
- Гадаадаас буцаж ирсэн иргэн,
- Хөгжлийн бэрхшээлтэй иргэн,
- Бусад
Хэрэгжүүлэх арга хэмжээ 2:
Ажилд зуучлах
Ажилд зуучлах гэдэг нь: Ажил хайж буй иргэнд хүсэл, сонирхол, мэргэжил, ур чадварт нь тохирсон ажил олоход, ажил олгогчид эрэлт хэрэгцээнд нь нийцсэн ажилтан олоход туслалцаа үзүүлэх үйлчилгээг хэлнэ.
Хамрах хүрээ:
- Ажил хайгч
- Ажилгүйдэлд өртөж болзошгүй иргэд
Хэрэгжүүлэх арга хэмжээ:3
Нэгдсэн бүртгэл, мэдээллийн үйлчилгээнд хамруулах
Хөдөлмөр эрхлэлтийн бүртгэл, мэдээллийн нэгдсэн сан нь: ажиллах хүчний талаарх мэдээ, мэдээлэл, ажлын байрны болон ажил хайгч, ажилгүй иргэн, ажилгүйдэлд өртөж болзошгүй иргэн, ажил олоход хүндрэлтэй иргэн, хөдөлмөр эрхлэлтийг дэмжих үйл ажиллагааг хэрэгжүүлэгч болон уг үйл ажиллагаанд хамрагдсан иргэн, аж ахуйн нэгж, байгууллагатай холбогдсон бүртгэл, мэдээллийг агуулна.
Хамрах хүрээ:
- Ажил хайгч, ажилгүй иргэн
- Ажилгүйдэлд өртөж болзошгүй иргэн,
- Ажил олоход хүндрэлтэй иргэн,
- Ажил олгогч байгууллага
Хэрэгжүүлэх арга хэмжээ 4:
Ажилгүйдлийн тэтгэмжийн тодорхойлолт гаргаж өгөх.
Ажилгүйдлийн тэтгэмжийн тухай хуульд заасны дагуу нийгмийн даатгалын шимтгэлийг 24 сараас доошгүй хугацаанд, үүнээс сүүлийн 9 сард нь тасралтгүй төлсөн тохиолдолд ажилгүйдлийн тэтгэмж авах эрх үүснэ. Харин урьд нь ажилгүйдлийн тэтгэмж авч байсан даатгуулагч ажилгүйдлийн даатгалын шимтгэл 12 сар төлсөн нөхцөлд тэтгэмж авах эрх үүснэ. Ажлаас халагдсан даатгуулагч ажил олгогчтойгоо тооцоо хийж дууссанаас хойш 14 хоногийн дотор, хүндэтгэн үзэх шалтгаантай бол 3 хүртэл сарын дотор оршин суугаа нутаг дэвсгэрийнхээ хөдөлмөр эрхлэлтийн алба, уг бирж байхгүй бол нийгмийн даатгалын байгууллагад бүртгүүлэх үүрэгтэй.
Хамрах хүрээ:
- Нийгмийн даатгалын шимтгэлийг 24 сараас доошгүй хугацаанд, үүнээс сүүлийн 9 сард нь тасралтгүй төлөн ажиллаж байгаад ажлаасаа чөлөөлөгдсөн иргэн
Хэрэгжүүлэх арга хэмжээ 5:
Бусад үйлчилгээг үзүүлэх
Хөдөлмөр эрхлэлтийг дэмжих бусад үйлчилгээнд цагийн ажилд зуучлах үйлчилгээ ба төрөлжсөн нэгдсэн хөдөлмөрийн бирж зохион байгуулах үйлчилгээ, гэрээт болон түрээсийн хэлбэрээр хөдөлмөр эрхлэх үйлчилгээ, гарааны бизнес эрхлэлтийн хөдөлмөр эрхлэх үйлчилгээ хамаарагддаг.
Хамрах хүрээ:
Хөдөлмөр эрхлэлтийн нийтлэг үйлчилгээ, хөдөлмөр эрхлэлтийг дэмжих төсөл хөтөлбөрт хамрагдсан болон хамрагдах хүсэлтэй иргэд.
