БИНДЭР СУМАНД АЖЛЫН БАЙРЫГ ДЭМЖИХ ХӨТӨЛБӨР АМЖИЛТТАЙ ХЭРЭГЖИЖ БАЙНА.

Биндэр сумын "Цагаан нуга нөхөрлөл" нь сумын хогийн цэгийг хариуцан ажилладаг бөгөөд 2018 онд Ажлын байрыг дэмжих хөтөлбөрийн хүрээнд нөхөрлөлийн гишүүн Ц.Батчулуун “Хог хаягдал боловсруулах” төслийг хэрэгжүүлэхээр 3 сая төгрөгний эргэн төлөлттэй санхүүгийн дэмжлэгт хамрагдан, нөхөрлөлийн ахлагч С.Нацагдоржийн хамтаар хог хаягдлыг ангилан, дахин боловсруулан, гадна талбайн тохижилтын сандал, замын хавтан үйлдвэрлэж байна. 
Төслийн хүрээнд хог хаягдлыг түүх, ангилахад 4 иргэнийг түр ажлын байраар хангаж ажилласан бөгөөд цаашид хог хаягдлыг анхан шатнаас ангилах нь чухал байгааг тэрбээр дурдаж байлаа. 
Эдгээр үйлдвэрлэсэн бүтээгдэхүүнээрээ Хэнтий аймгийн ЗДТГ, Хэнтий мэдээ сониноос зохион байгуулсан Хог хаягдлыг ашиглах болзолт уралдаанд тэргүүн байр, “Нөхөрлөл хөгжил”-ийн наадмын Байгальд ээлтэй бүтээгдэхүүн шалгаруулах уралдаанд тэргүүн байрыг тус тус эзэлсэн амжилттай байна. Тэрээр хаягдал материал ашиглаж хийсэн шүүр, хуванцарыг хайлуулж үйлдвэрлэлд оруулсан хавтан, хашлага, сандал, төмөр хөрөө, заазуур, шахмал түлшээрээ тус уралдаанд оролцсон юм.