ХӨДӨЛМӨРТ БЭЛТГЭХ, ХӨДӨЛМӨР ЭРХЛЭЛТИЙН УР ЧАДВАР ОЛГОХ ХӨТӨЛБӨР
Иргэдийг хөдөлмөрт бэлтгэх арга хэмжээ болон хөдөлмөр эрхлэлтийн ур чадвар олгох сургалтад хамруулж хөдөлмөрийн зах зээлд бэлтгэн ажлын байранд дадлагажуулах замаар хөдөлмөр эрхлэлтийг дэмжихэд хөтөлбөрийн зорилго оршино.
Хэрэгжүүлэх арга хэмжээ 1:
Хөдөлмөрт бэлтгэх арга хэмжээг зохион байгуулах
Тус арга хэмжээг дараах 2 хэлбэрээр зохион байгуулна.
А. Зөвлөгөө, мэдээлэл өгөх
Энэхүү арга хэмжээ нь иргэдэд ажил, мэргэжлийн чиг баримжаа олгох болон нийгэмшүүлэх зөвлөгөө өгөх, хөдөлмөрийн харилцааны мэдлэг олгох зорилготой.
Б. Сургалт зохион байгуулах
Тус арга хэмжээ нь иргэдийг харьцааны ур чадвар, сэтгэл зүй, хувь хүний төлөвшилт, хөдөлмөрийн харилцаа, хөдөлмөрийн аюулгүй ажиллагааны талаарх мэдлэг олгох сургалтуудад хамруулах зорилготой.
Хэрэгжүүлэх арга хэмжээ 2:
Тус арга хэмжээ нь иргэдийн суралцах мэргэжлийн чиглэл, хэлбэр, боломжийн талаарх хүсэлтийг нь үндэслэн, тэднийг хөдөлмөр эрхлэлтийн сургалтад хамруулах зорилготой. Тус арга хэмжээг дараах 2 хэлбэрээр зохион байгуулна.
А. Үйлдвэрлэл дээрх сургалт
Энэхүү сургалт нь үйлдвэрлэл дээрх сургалтын онолын хичээлийг тухайн сургалт зохион байгуулсан аж ахуйн нэгж нь мэргэжлийн боловсрол, сургалтын байгууллагатай хамтран, сургалтын дадлагын хичээлийг онолын багшийн эсхүл үйлдвэрлэлийн дадлагажуулагч багшийн арга зүйн удирдлага дор тухайн аж ахуйн нэгж өөрийн үйлдвэрлэлийн байранд зохион байгуулдаг бөгөөд иргэдийг үйлдвэрлэлийн дадлага олгож мэргэшүүлэх зорилготой.
Б. Мэргэжлийн болон давтан сургалт
Тус арга хэмжээ нь хөдөлмөрийн зах зээл, ажил олгогчдын эрэлт, ажлын байрны захиалга, ур чадварын судалгаа, ажилгүй иргэдийн хэрэгцээнд нийцүүлэн тэднийг мэргэжлийн болон давтан сургалтад хамруулах ажлыг зохион байгуулах зорилготой.
“Мэргэжлийн сургалт” гэж мэргэжилгүй иргэнд шаардлагатай багаж хэрэгсэл, тоног төхөөрөмж, технологи ашиглан мэргэжлийн ажил, ажилбар гүйцэтгэх ур чадвар эзэмшүүлж, чадамжийн гэрчилгээ олгохыг ойлгоно.
“Давтан сургалт” гэж хөдөлмөрийн зах зээлд эзэмшсэн мэргэжил нь эрэлтгүй болсны улмаас ажилгүйдэлд өртөж болзошгүй байгаа иргэнд мэргэжлийн шинэ ур чадвар, чадамж эзэмшүүлж, чадамжийн гэрчилгээ олгохыг ойлгоно.
